استراتژی‌لر و سئچیم‌لر- بیرینجی بؤلوم
اؤنوموزده‌کی ایران اسلام جمهوریتی‌نین جمهور باشقان‌لیغی سئچیمی‌نی فرق‌لی باخیش‌لار ایله اینجه‌له‌یه بیلیریک. بو یازی‌دا گونئی آذربایجان میللی حرکتی استراتژی‌لری چرچیوه‌سین‌دن قونویا باخمایا چالیشاجاغام. بورادا اینجه‌له‌دیغیم استراتژی‌لر، دنیادا باشاریلی میللی حرکت‌لرین اورتاق استراتژی‌لری‌دیر و گونئی آذربایجان میللی حرکتین‌ده ده چوخ زامانلار تشکیلاتلار و میللی فعاللار طرفیندن دیله گتیریل‌میش‌دیر.
هر میللی حرکت، یئنی فرصت‌لر یارادمایا چالیشیر ویا باشقا وضعیت‌لردن دولایی یارنمیش فرصت‌لری یاخالار، سونرا او فرصتی میللی حرکتینین هدفی یؤنون‌ده قوللانیب یؤنه‌تر. سئچیم اورتامی چوخ اؤنملی بیر فرصت‌دیر و بیز بو فرصتی دوغرو دوزگون ده‌یرلن‌دیرمه‌لی‌ییق. بورادا هم سئچیم‌لره اکتیو قاتیلاراق هم ده سئچیم‌لری اکتیو بایکوت ائده‌رک بو فرصتی ده‌یر‌لن‌دیره‌بیلیریک. اما طرفسیز و یا پاسیو بایکوت ایله یالنیز بو فرصتی یاندیرمیش اولوروق، حتی میدانی میللی حرکتین دشمن‌لرینه بوراخاراق، میللی حرکته ضرر وئره‌بیلیریک. البته دقت ائت‌مه‌لی‌ییک کی هر یاخالادیغیمیز فرصت، بیزی بیر آددیم قاباغا آپارابیلر و بوتون هدف و ایستک‌لریمیزه گؤتورمز. هر فرصت‌دن استفاده ائدیب، میللی حرکتیمیزی بیر آددیم قاباغا آپارساق، آددیم-آددیم تک آماجیمیز یعنی گونئی آذربایجان میللی دولتی قورماق دوغرولتوسوندا ایلرله‌یه‌بیلیریک.
باشلامادان اؤنجه وورقولامالیام کی بورادا خامنه‌ای نه قدر جلاددیر، جمهوری اسلامی نه قدر کؤتو و قداردیر ویا بو رژیم‌ده رفرم امکانی وارمی، پزشکیان نه قدر تورک دوستو ویا دوشمانیدیر ویا جمهور باشقانی اولورسا نه‌لر ائده‌بیلر ویا ائده‌بیل‌مز، سؤز قونوسو ده‌ییل. بئله‌سی دوشونجه و سورولار، حالا ایرانا اومودو اولان و ایراندان آذربایجان بیر فایدا گه‌له‌جه‌غینی دوشونن ذهنیت‌ده اولابیلر. میللی حرکتیمیز، ایران چرچیوه‌سین‌ده سورولان بئله‌سی سورولاردان گئچیب، یالنیز گونئی آذربایجان میللی حرکتی و خالقینا تمرکز ائت‌مه‌لی‌دیر. دویقولاریمیزین اسیری اولمادان، میللی حرکتیمیزین هدفی یعنی گونئی آذربایجان میللی دولتی‌نین قورولماسینا بیزی بیر آددیم یاخین‌لاشدیران و ایلکه‌لریمیز چرچیوه‌سین‌ده اولان هر استراتژی و تاکتیکی مباح بیلیب، دوغرو و دیقت‌لی شکیلده قوللانمالی‌ییق.
1- ایران و ایرانچیلیغین ائگئمن و ایدئولوژیک نفوذونو هر آلان‌دا چوروت:
“ایران‌دا یاشایان خالقلار بیر میللت‌دیر، اورتاق سرنوشت‌لری وار و اورتاق دیللری فارسجادیر” جمله‌سی، ایرانچیلیق تئوریسنین تملی‌دیر. بو جمله امرپالیست‌لرین تورک کیم‌لیغی و آذربایجانین وارلیغینا قارشی قورقولادیغی تئورینین خلاصه‌سی‌دیر. گونئی آذربایجانین قورتولوشو اوچون، بو تئوری گونئی آذربایجان خالقی آراسیندا چورو‌مه‌لی‌دیر. بو تئورینین چورو‌مه‌سی‌نین بیر یولو آذربایجان و ایران آراسینداکی ایکی‌له‌می(دوگانگی) گؤستریب اثبات‌لاماق‌دیر. خالقیمیز، آذربایجانلیلار و یا تورکلر ایله ایران و فارسلارین قارشی قارشیا اولدوغونو حس ائده‌رسه، ایرانچیلیق تئوریسی ده خالقیمیزین آراسیندا چورومه‌یه باشلار. سئچیم فرصت لرینی استفاده ائده‌رک خالقیمیزدا بیز و اونلار آیریمی اولدوغونو گوج‌لن‌دیره‌بیلیریک. بیز آذربایجانلیلار بو آداما اوی وئردیک آما اونلار وئرمه‌دی‌لر، بیز تورکلر بایکوت ائت‌دیک اما اونلار قاتیلدیلار، اونلارین گؤزو بیز تورک‌لری گؤتورمور، اونلار آذربایجانلی بیر تورکون جمهورباشقانی اولماسینی ایستمیرلر و … کیمی جمله‌لرین قورولماسی اوچون اورتام یارادیب، بو ایکی‌لم‌ین یارانماسینا سبب اولابیلیریک. بونون ترسی اولورسا یعنی میللی حرکت پاسیو اولورسا، خالقیمیزین هم سئچیم‌لری تحریم ائدن بؤلومو هم ده قاتیلان بؤلومو، ایرانچیلیق دوشونجه‌سی ایله قاتیلیب ویا تحریم ائده‌جک. یعنی یا خارج‌ده‌کی ایرانچی اوپوزیسیون تاثیری آلتیندا تحریم ائده‌جک، یا دا ایچریده‌کی اصلاحاتچی و رفرمیست‌لرین تاثیری آلتیدا قاتیلاجاق. هر ایکی‌سی ده ایران و ایرانچیلیغی داها چوخ منیم‌سه‌مک یعنی ایرانچیلیق تئوریسی‌نین گؤج‌لن‌مه‌سی دئمک‌دیر.
گونئی آذربایجان تورک‌لری نه قدر بو ایکی‌له‌می حس ائت‌سه‌لر بیر او قدر میللت‌لش‌میش اولورلار و ایرانین باشقا خالق‌لاری ایله اورتاق سرنوشتی اولدوق‌لاری تئوریسی ده چوروموش اولور. بونون‌لا برابر تورک دیلی قونوسونون بو سئچیم‌ده مرکز نقطه‌ده اولماغی، فارس دیلی‌نین اورتاق دیل ویا میللی دیل اولدوغو ادعاسی‌نی دا چوروده‌بیلیر.
2- ایران دولتی‌نه چالیشان آذربایجانلی‌لاردا، ایران حاکمیتینی ضعیف‌لت:
هر باشاریلی میللی حرکتینین ان اؤنملی استراتژی‌لرین‌دن بیری، اؤزوندن اولان آما دشمنه چالیشان اولادلارینی، اؤز جبهه‌سی‌نه جذب ائت‌مک‌دیر. ایرانین دولت ارگان‌لارین‌دا چالیشان، گونئی آذربایجانلی ایشچی‌لر، کارمندلر، مدیرلر، پلیس‌لر، سپاهی‌لر، ارتشی‌لر و … زمان ایچینده، رئژیمین پروپاگاندا و باسقی‌لاری سونوجوندا، ایرانچیلیق دوشونجه‌سینی منیم‌سه‌ییب اینانیرلار. اونلارین ایرانچیلیغی یالنیز آلدیقلاری معاش‌دان قایناق‌لان‌میر. اونلارین بیر چوخو رژیمین ایدئولوژی‌سینه اینانیب دوغرو اولدوغونو دوشونورلر. آما اونلاری مانقورد آدلاندیرماق دا یانلیش‌دیر. اونلارین بیر چوخو حالا تورکلوغونو و آذربایجانی سئون انسان‌لاردیلار کی، ایرانچیلیق و اسلام جمهوریتی‌نین، تورک و آذربایجان دشمنی اولدوغونو دوشون‌مورلر. جمهور باشقانی سئچیم‌لری فضاسین‌دان استفاده ائدیب، ایرانچی‌لارین و اسلام جمهوریتی‌نین نه قدر آذربایجان و تورکلره قارشی و دشمن اولدوغونو گؤسته‌ره‌بیلیریک. مثلا بیر چوخ دوستوموز دئییر کی آذربایجانلیلار اوی وئرسه‌لر و پزشکیان چیخسا دا، یئنه ده حاکمیت یا اوی‌لاردا تقلب ائدیب ایسته‌دیغینی چیخاراجاق یا دا پزشکیان، جمهور باشقانی اولورسا اونا مانع یاراداجاق‌لار و وعده‌لرینه عمل ائده‌مه‌یه‌جک. بو ادعالارا نه قدر امین اولساق دا، هیچ بیر زامان اثبات ائده بیلمه‌ریک، اما رژیمین ایچینده اولان آذربایجان اولادلاری بونلاری گؤره‌جک‌لر، و آذربایجان و تورکلره اولان حق‌سیزلیک‌لری نه قدر آچیخ شکیلده گؤرسه‌لر، او قدر رژیم‌دن داها چوخ قوپوب میللی دوشونجه‌یه یاخینلاشاجاق‌لار و اونلارین اوستونده ایران حاکمیتی ضعیف‌له‌میش اولاجاق. بونلار بیزیم گه‌له‌جه‌ییمیز اوچون سرمایه‌لریمیز اولاجاق و زمانی گلدیغین‌ده بروکراتیک و عسگری تجربه‌لری ایله میللی حرکت و گونئی آذربایجان میللی دولتی‌نی دستک‌له‌یه‌جک‌لر.
Bir yanıt yazın