رئیسی‌نین اؤلدوغوندن سونرا، ایران اوچون جمهور باشقانی سئچیمی‌نین سون آشاماسین‌داییق و هر سئچیم‌ده اولدوغو کیمی یئنه ده، میللی حرکت‌ده بو سئچیمه قاتیل‌مالی‌ییق می یوخسا قاتیل‌مامالی‌ییق می سوروسو باشلامیش‌دیر. محتمل یئنه ده گونئی آذربایجان میللی حرکتینین بیر قیسمی پزشکیانی دستک‌له‌یه‌رک، سئچیمه قاتیل‌یب رول اوینامایا چالیشاجاق، بیر آیری قیسمی دا ایران رژیمینین غیر مشروع اولدوغونو سؤیله‌یه‌رک، هر جور سئچیمه قاتیل‌ماغی یانلیش بیلیب قارشی گه‌له‌جک‌دیر. گونئی آذربایجان میللی حرکتی اولاراق سئچیم قونوسونو بیر دفعه‌لیک دوغرو دوزگون دانیشیب بوتون سئچیم‌لر اوچون اورتاق بیر دیسیپلین و استراتژی‌یه یئتیش‌مه‌لی‌ییک.
منجه سئچیم‌لرده، شخص و آدای‌لار اوستون‌ده تارتیش‌ماق یانلیش‌دیر. ایران اسلام جمهوریت‌ینین 40 ایل‌لیک تاریخی گوستریر کی بو سیستم‌ده شخص‌لر، یالنیز تدارکاتچی‌دیرلار و گئچمیش دوشونجه‌لری و سؤیلم‌لری، گؤره‌جک‌لری ایشلر ین گارانتی‌سی اولاماز. اونون اوچون منجه بو شخص آذربایجان ایله ایلگیلی ائله دئمیش – بئله دئمیش کیمی سؤزلر، نه سئچیمه قاتیل‌ماغین گرک‌چه‌سی اولمالی‌دیر نه ده قاتیل‌ماماغین. فارس چؤل‌لرینین باتاق‌لیغینا دوشن بیر انسانین، تورک و آذربایجانا هیچ بیر زامان یارارلی اول‌ماییب و یالنیز ظالیم سیستم‌ین خدمت‌ین‌ده اولاجاغینی بیلیب، بیر یئره یازیب، اونودمایالیق. او باتاق‌لیق‌لارا نئجه آلپ‌تکین‌لر گیردی آما خسروشاه اولاراق چیخدی، نئجه آلپ‌ارسلان‌لار گیردی آما کیقباد اولاراق چیخدی. بیرینین وعده‌لرینه ویا گئچمیش‌ده‌کی سؤزلرینه اینانیب اورایا گؤندریب، سونرا اوندان تورک و آذربایجانا یارار گؤزله‌مک ساده‌لیک و عوام‌لیق‌دیر.
هر ائیلم و سؤیلم‌لری‌میزده دقت ائت‌دیغیمیز کیمی، سئچیم‌لره قاتیل‌یب-قاتیلماماق اوچون ده سوراجاغیمیز اؤنم‌لی بیر سورو وار و او سورو دوغرولتوسوندا قراریمیزی آلمالییق. سورو بودور : بو سئچیمه قاتیل‌یب-قاتیل‌ماماغین، گونئی آذربایجان میللی حرکتینین “آزادلیق، عدالت، میللی حکومت” شعاریندا خلاصه اولموش، گونئی آذربایجان اوچون میللی دولت قورما هدفینه نه فایداسی و نه ضرری اولاجاق؟
البته بورادا قاتیل‌ماق و قاتیلماماق دئدیغیمیزده، آکتیو قاتیلیم سؤز قونوسودور، نورمال بیر وطن‌داشین اوی وئریب وئرمه‌دیغین‌دن سؤز گئتمیر، یعنی بیر شخص ویا گروه، گونئی آذربایجان میللی حرکتی آدینا آدای‌لارین ستادلارینا گئدیب اونلار ایله موزاکره ائدیب، بیر آدایین له‌ینه کامپانیا آپاریب ویا سئچیم‌لرین بایکوتو قونوسوندا بیانیه وئرمک‌دن سؤز گئدیر.
منجه نه سئچیلن بیرینین سیستمه گیردیغین‌دن سونرا آذربایجان و تورک‌لره گؤزله گؤرونور بیر فایداسی اولور، نه ده آذربایجان و تورک‌لرینین سئچیمه قاتیل‌ماماغی ایله اسلام جمهوریت‌ینه و اونون سؤزده مشروعیت‌ینه گوزله گؤرونور بیر ضرر یئتیشیر. اونون اوچون قاتیل‌یب قاتیل‌مادان اؤنجه پوپولیستی سؤیلم‌لری بوراخیب، گرچک فایدا و ضررلری دوشون‌مه‌لی‌ییک. قونو آیدین‌لاشماق ایچین، سئچیم ایله ایلگیلی گونئی آذربایجان میللی حرکتی اوچون محتمل فایدالار و ضررلردن بعضی‌لرینی ساییرام:
1- فایدالار :
-سئچیم اتمسفری سایه‌سین‌ده، خالقیمیزین سیاسی‌لش‌مه‌سی و گونئی آذربایجان قونوسوندا داها حساس و حرکت‌لی اولماسینی ساغلاماق
-سئچیم اتمسفری سایه‌سین‌ده، میللی فعال‌لارین بیربیرینی تانیما، بیرلش‌مه و اؤرگوت‌لن‌مه امکان‌ینین یارانماسی
-خالقیمیزین ایستک و حساسیت‌لری دوغرولتوسوندا حرکت ائت‌دیغیمیزی و اونلاری تمثیل ائت‌دیغیمیزی گؤستریب اونلارین گونئی آذربایجان میللی حرکتی‌نه گوون‌مه‌لرینی ساغلاماق
-خالقیمیزا چاره‌سیز اولمادیق‌لارینی و ایسته‌دیک‌لری زامان، باشارا بیله‌جک‌لری‌نی اثبات‌لاماق
2- ضررلر:
-خالقیمیزی خیال قیریق‌لیغینا اوغرادیب اونلارا اومودسوزلوق و چاره‌سیزلیق حیسسی وئرمک
-میللی فعاللار و شبکه‌لرینی، اؤنم‌سیز یئره آچیغا چیخاریب، تهلکه‌یه آتماق ویا میللی حرکتین ایچین‌ده اختلاف‌لارا ندن اولماق
-خالقیمیزین ایستک و حساسیت‌لری دوغرولتوسوندا حرکت ائت‌مه‌دیغیمیزی گؤستریب اونلارین گونئی آذربایجان میللی حرکتی‌نه گوون‌مه‌مه‌لرینه سبب اولماق
سئچیمه قاتیل‌یب-قاتیل‌ماماغین فایدا و ضررلری، آدای‌لار و اونلارین وعده و پلانلاریندا ده‌ییل، اؤنوموزده‌کی بو 2 هفته‌ده‌دیر و بونو بو شکیل‌ده ده‌یرلن‌دیرمه‌لی‌ییک. هانکی استراتژی و تاکتیک‌لر ایله بو اورتامی اله آلاراق، میللی حرکتیمیزه ان چوخ فایدا و ان آز ضرر ساغلایاجاغیمیزی دوشون‌مه‌لی‌ییق. منجه قاتیل‌یب-قاتیلماماق قونوسوندا بیر آز صبرلی و تمکین‌لی اولمالی‌ییق. آدای‌لار بیزیم دستک‌له‌یه‌جغیمیزی بیلیب، جیب‌ده اولدوغونو دوشون‌سه‌لر، بیزیم گؤنلوموزو آلماغا، یعنی اوست‌ده یازدیغیم فایدالارین اورتامینی یارادمایا چالیش‌مازلار و قارشی طرف‌لرین گؤنول‌لرینی آلمایا یؤنه‌لیرلر. بیزیم کسین‌لیک‌له دستک‌له‌مه‌دیغیمیزی بیل‌سه‌لر ده، یئنه عینی شکیل‌ده قارشی طرف‌لره یؤنه‌لیرلر. بیز گونئی آذربایجان و اونون تمثیل‌جی‌سی میللی حرکت اولاراق، میللتی هیجانا گتیریب بیر آدای‌یی چیخارماق گوجوموز وار و بونو اونلار بیلیرلر. بو دوغرولتودا منجه دیشاری‌دا اولان میللی فعاللار و تشکیلات‌لار تمکین‌لی اولمالی‌دیرلار و عجله ایله، له ویا علیه بیانیه‌لر وئرمه‌مه‌لی‌لر. بو ایشی ایلک باشدا ایچریده‌کی دوستلاریمیزا بوراخالیم، اونلار مذاکره‌لره گیرسین‌لر و آدای‌لارین و حتی سیستم‌ین، گونئی آذربایجان میللی حرکتینین سؤیلمی دوغرولتوسوندا یارات‌دیغی اورتامی ده‌یرلن‌دیرسین‌لر. سون هفته، اونلارین ده‌یرلن‌دیرمه‌له‌رینه باخاراق و دایاناراق نئت توتوم بیلدیره‌لیم.
Bir yanıt yazın