گونئی آذربایجان میللی حرکتی، ایران اسلام جمهوریتینین داخلی و خارجی اوپوزیسیونو ایله آینی هدفی گودمور. جمهوری اسلامی‌نین بوتون اوپوزیسیونو، ایران و ایران دولت‌چیلیغینی قورویوب داها گوجلو ائتمک اوچون حکومتین دییش‌مه‌سینی ایستییرلر. اونلار یالنیز اسلام جمهوریتینه یعنی حکومته قارشیدیرلار، ایران و ایران‌چیلیق دوشونجه‌سینه دییل. میللی حرکتیمیز ایسه، ایران و ایران‌چیلیق دوشونجه‌سینی گونئی آذربایجانین فلاکتینین سببی اولاراق گؤرور. حکومتلر، ایران و ایران‌چیلیق تئوریسینین بیر محصولودور، اسلام جمهوریتینین ییخیلماسی ویا دییشمهسی خالقیمیزی فلاکت‌دن قورتارماز. اونون یئرینه گلن هر حکومت، یئنه ایران و ایران‌چیلیق مفکوره‌سی ایله اولاجاق، حتی اوپوزیسیونون پولیتیکالارینی اینجه‌له‌دیغیمیزده داها بئتر اولاجاغینی دییه‌بیلیریک.
گونئی آذربایجان خالقی یوز ایل‌دیر، حکومتی دییش‌دیریب داها دموکراتیک بیر حکومت قوروب اوز پاییمیزی آلاجاغیق دوشونجه‌سی ایله، ایران اوچون بؤیوک فداکارلیق‌لار ائدیبدیر، آما هر سفرینده داها بئتر فلاکت و خسرانا اوغراییبدیر. آرتیق هر کس آنلامالیدیر کی گونئی آذربایجانین قورتولوشو، یالنیز ایران دولت‌چیلیغیندن قورتولوب اؤز دولتیمیزی قورماقدان گئچر. میللی حرکتیمیزین تک آماجی میللی دولتیمیزی قورماق‌دیر، ایران حکومتی‌نی دییش‌دیرمک دییل. ایرانین قالانی ایستر داغیلسین، فدرال اولسون، اولدوغو کیمی قالسین، دها بئتر اولسون ویا داها یاخجی اولسون. بونلارین هیچ بیری آماجیمیزی ائتکیلمز و دییش‌دیرمز.
بو آماجیمیزا یئتیشمک اوچون موجود حکومتین دییشمهسی ویا ییخیلماسی شرط دییل و دوروما گوره فرقلی اولابیلیر. کسین بیلدیغیمیز تک بیر شئی وار، او دا ایران دولتینی یؤنتن حکومت نه قدر گوجسوز، باشاریسیز و مشروعیت‌سیز اولسا، گونئی آذربایجان دولتینی قورماغین هزینه‌سی او قدر آز اولاجاق . بونا گوره گونئی آذربایجان میللی حرکتی ایله اپوزیسیونون هدف‌لری بیربیرینه ضددیر و اونلار ایله بیرلشمک و اورتاق‌لیق ائتمک آنلام‌سیز و امکان‌سیزدیر.
Bir yanıt yazın