گونئی آذربایجانین زنجان شهرین‌دن اولان نرگیس محمدی‌نین نوبل باریش اؤدولو، اوراهان پاموک‌ون ادبیات اؤدولو و عزیز سانجارین کیمیا اؤدولو قدر چوخ ده‌یرلیدیر و گونئی آذربایجان میللتی‌نین بیر ائولادینین بو باشاریسینا چوخ سئویندیم. اونو اورک‌دن تبریک ائدیرم.
نئجه کی بیر گونئی آذربایجانلی، فیزیک ویا کیمیا اؤدولو آلدیغیندا اونون میللی و سیاسی باخیشینا باخمایاراق سئوینیریک، نرگیس محمدی خانیمین دا ده‌یرلی نوبل اؤدولونه او شکیلده سئوینمه‌لییق.
بو دییرلی اؤدول بیر داها اثبات ائله‌دی کی، دنیا گؤزونده “میللی حاقلار”، “دموکراسی و انسان حاقلاری”نین قونوسو ده‌ییلدیر. بیز دنیایا درس وئرمک دوروموندا دییلیک، بیزه دوشن بوندان درس چیخارماقدیر. بو حاقلار بیربیرینه قارشی دییل، آما فرقلی قونولاردیر. یعنی نه بیر میللی حکومت قورولورسا، اونون دموکراتیک و انسان حاقلاری‌نا سایغیلی اولاجاغی قارانتی‌لی‌دیر، نه ده دوموکراتیک بیر حکومت قورولورسا، میللی حاقلاری وئرجه‌غی قارانتی‌لی‌دیر. دنیانین ان دیکتاتور حکومتی یعنی ایران‌دا، ائتنیک گروه‌لارین کیملیغی نه قدر یوخ اولوب آسیمیله اولور ایسه، دونیانین ان دموکراتیک اؤلکه‌سی اولان فرانسه‌ده ده ائله او قدر یوخ اولوب آسیمله اولور. تام ترسینی ده دیه‌بیلیریک، سودان-عمرالبشیر کیمی قاددار و دیکتاتور بیر حکومت‌دن باغیمسیزلیغینی آلان گونئی سودان دا اولا‌بیلیر، چک و اسلواکی کیمی دموکراتیک بیر شکیلده باغیمسیزلیق دا اولا بیلیر.
سون اولاراق، دموکراسی و انسان حاقلاری، اینسانلیغین چوخ اؤنملی قازانیم‌لاری‌دیر و گونی آذربایجان میللی حرکتینین ان اؤنملی اصلی و ایلکه‌سی‌دیر، اما هدفی دییل، چونکو یالنیز دموکراتیک بیر حکومت قوراراق میللی حاقلارا واریلماز. میللی حاقلارا وارماق اوچون میللی موجادیله ائتملی‌ییک.
Bir yanıt yazın