تورکیه، ساواشین ایلک گونلرینده طرفسیز بیر توتوم سرگی‌له‌دی، آما 2-3 هفته سونرا فلسطین و حماس‌دان یانا چوخ آغیر چیخیشلار ائدیب، حماس‌ین ترور اؤرگوتو اولمادیغی‌نی و اسرائیل‌ین ساواش سوچلوسو اولدوغونو اعلان ائتدی. پئکی بو آرادا نه اولدو دا تورکیه پارادایم دییشتیردی؟
منجه بونو آنلاماق اوچون اورتادوغو سیاستینده مشهور بیر سؤزه دقت ائتمک‌ده فایدا وار: “اورتادوغودا بیر پارتی وارسا و آدینیز او پارتی‌نین دعوت لیسته‌سین‌ده دییل ایسه، آدینیز یئمک مئنوسوندادیر”
تورکیه و اؤزللیک‌له آک پارتی حکومتی، بونو گؤز اؤنونه آلاراق، اورتادوغودا اولان-بیتن هر شئی‌ده ماسانین باشین‌دا و دعوت لیسته‌سین‌ده اولمایا چالیشیر، یوخسا یئمک لیسته‌سن‌ده اولاجاق و تورکیه‌یی یئمه‌یه توپلاناجاق‌لار.
بو قاپسام‌دا، ساواشین ایلک گونلرینده، تورکیه طرفسیز و آرابولوجولوق رولو اوینادی. حتی باریش پلانی حاضیرلاییب باریش‌ین گارانتورلوغونو بئله قبول ائتدی. آما باتی جبهه‌سی تورکیه‌نین بو چابالارینی گؤرمزدن گلیب تورکیه‌نی اویناتمادی. یعنی تورکیه‌یه بو پارتی‌نین دعوت لیسته‌سین‌ده اولمایجاغینی بیلدیردیلر. ائله او زمان تورکیه پارادایم دییشتیردی و تام گاز فلسطین و حماس‌دان یانا توتوم گؤستردی. یعنی باتی جبهه‌سی تورکیه‌یه پارادایم دییش‌دییرمک‌دن باشقا چاره بوراخمادی.
بوگون تورکیه‌نین توتدوغو سیاستین سونوجلارینی گؤروروک. 5 کاسیم بازار گونو، آمریکا دیش ایشلری ناظیری بلینکن، تورکیه‌ده اولاجاق و چوخ احتمال ایله فلسطین-اسرائیل ساواشینین گئدیشاتینی تارتیشیاجاقلار.
Bir yanıt yazın