گونئی آذربایجان میللی حرکتینین اساسلاری
گونئی آذربایجان میللی حرکتی نه‌دیر؟ هدف و آماجی نه‌دیر؟ ایلکه‌لری نه‌دیر؟ هدفه چاتماق اوچون عمومی استراتژی و پلانلاری نه‌دیر؟
باشقا تورک دیلی شیوه و الفباسی ایله اوخو
دان اولدوزو الکترونیک کتابی‌نی آذربایجان تورکچه شیوه‌سی لاتین الفباسی و تورکیه تورکچه شیوه‌سی ایله ده اوخویا بیلرسینیز
 AzərbaycanDAN ULDUZU: Güney Azərbaycan Milli Hərəkətinin Əsasları pdf e-kətab indir |  TürkiyeDan Ulduzu: Güney Azerbaycan Milli Hareketinin Esasları pdf e-kitap indir |
گیریش
گونئی آذربایجانین دورومو
دولتیمیزی اشغال ائدیب، بیزی بوتون امکان‌لار‌دان محروم ائت‌سه‌لر ده، بیر مللت اولاراق وار اولماغا دوام ائدیب، هر فرصتده، میللی دولتیمیزی یئنیدن قورماغا چالیش‌میشیق. حتی سیاسی، اجتماعی و بین الملل ساحه‌لر‌ده، اؤزوموزو قورتاراجاق یئنی امکانلار دا یاراتمیشیق. بوگون بو امکانلار سایهسینده، میللی حرکت، یعنی میللتیمیزین قورتولوش ساواشی، هر زامان‌کین‌دن دها چوخ باشاریا یاخیندیر، چونکو:
- میللی حرکتیمیز، مدنی و ادبی ساحه‌لردن باشلاسا دا، بو گون میللتیمیزین اویانیشی سایه‌سن‌ده، سیاسی و میللی بیر دیرنیش و مجادله‌یه چئویریلیبب، اولوسلار آراسی سیاسته داشینیب‌دیر.
- خالقیمیزین چوخو، اؤزل مدنییته صاحیب اولدوغونو آنلاییب و صاحیب اولدوغو مدنیت و وطن‌ده، مستقیل‌لی‌یه لایق بیر میللت اولدوغو قناعت و سیاسی شعورونا یئتیشیب‌دیر.
- آرتیق گونئی آذربایجان اؤز تورکلویونه ساریلیر. بوگون تورکچولویون چیرپینان اورگی تبریزدیر، آذربایجاندیر.
- چوخلو ساییدا میللی دوشونور و آیدین یئتیشیب‌دیر. اونلارین چوخو گونئی آذربایجاندا یاشاییر و میللی حرکتیمیزه یؤن وئریر. عینی زاماندا دونیانین دؤرت بیر یانیندا، دوشونجه مرکزلرینده یئر آلیب، میللی حرکتیمیزین نظری اساسلارینی درین‌لشدیریب، اولوسلارآراسی سیاسته داخل ائدیرلر.
- آرتیق گونئی آذربایجان ایران‌چی‌لیق و ایران دولتچیلی‌یینی منیم‌سه‌میر و اونو اؤز دولتی کیمین قبول ائتمیر. ملتیمیز فیکیرده و دوشونجه‌ده، ایران دولتچیلی‌ییندن قوپوب، اؤز سرنوشتینی تورکلوک و تورک دونیاسیندا گؤرور.
- آرتیق میللی موجادیله‌میزین بایراغی تثبیت اولونوب، میللی فعاللارین چوغونلوغو اونو قبول ائدیب و ملتیمیز طرفیندن قبول ائدیلیر.
- ایران دولتچیلی‌یی ان گوجسوز دؤنمینده‌دیر. ایچریده خالق طرفیندن دسته‌یینی و ایدئولوژیک باغینی ایتیریب، دنیادا ایسه مشروعیتسیز بیر تروریست دولتی استاتوسوندادیر. عینی زماندا تحریملر، مالی و عسگری گوجونو ضعیف‌له‌دیب‌دیر.
- قوزئی آذربایجان جمهوریتینین باشاریلاری بیر اؤرنک کیمی گؤزلر اؤنونده‌دیر و ملتیمیز آذربایجان تورک دولتی آلتیندا داها مرفه، داها اؤزگور و داها گوجلو اولاجاغینا اینانیر.
- تورک دونیاسینین بیرلشمه‌سی و گؤجله‌نمه‌سی و تورک دولتلری تشکیلاتینین قورولوشو، میللتیمیزه گووه‌ن وئریر و آیدن گلجه‌یه اومودلان‌دیریب هوس‌لن‌دیریر.
نه‌دن دان اولدوزو؟
گونئی آذربایجان، تاریخین هر چاغیندا اؤز میللی دولتی سایهسینده آلنی آچیق بیر میللت اولاراق وار اولوبدور. آذربایجان تورک‌لری هر زامان انسانی ده‌یرلر، اؤزگورلوک‌لر و عدالت‌لی حاکمیت قونوسوندا بؤلگه‌نین اؤنجو میللتی و قونشولاری اوچون ایشیق و اومود قایناغی اولوبدور. آنجاق سون یوز ایل‌ده، گونئی آذربایجانین دولتینین، ایران دولت‌چیلیغی آدینا غصب ائدیلیب، استثمار اولون‌ماسی، میللتیمیزه بؤیوک ضررلر وئرمیش، میللی ثروت‌لرینی تالان ائتمیش و گون‌دن گونه مادی و معنوی باخیمدان یوخسول‌لوغا و فلاکته سوروک‌له‌میش‌دیر. عینی زاماندا آذربایجان تورک‌لرینین عدالت‌لی و انسان سئوه‌ر دولت‌چیلیغی‌نین یوخ اولماسی، بولگه‌نین باشقا خالقلارینین دا اومود و ایشیغینین سؤنمه‌سینه سبب اولموشدور. نئجه کی یوز ایلدیر، اونلار دا بیزیم کیمی ساواشلار، عدالت‌سیزلیک‌لر و ظلم آلتیندا ازیلیب، دنیا مدنیتیندن، رفاه‌دان و شرفلی یاشام حقیندن، چوخ اوزاق‌لاشمیش‌لار.
فارس فاشیزمی و امپریالیست گوجلرین تورک دشمن‌لی‌یی و بعضی آذربایجان‌لی آیدین‌لارین گئچمیشده‌کی یانلیش حرکت و دوشونجه‌لری، گونئی آذربایجانین فلاکتینین ان اؤنملی سبب‌لریندن‌‌دیر. گئچمیش یوز ایلین تجربه‌سینه باخدیغیمیزدا، آیدین‌لاریمیزین داها اونجه گئتدیک‌لری یوللارین چوخونون یانلیش نتیجه‌لره سبب اولدوغونو گؤره بیلیریک. ایران آدینا و ایرانین دموکراتیک‌لشمه‌سی یولوندا وئریلن مجادله و فداکارلیق‌لارین هامیسی، خالقیمیزین، خوشبخت‌لیغی یئرینه فلاکتینه سبب اولموشدور. او فلاکت‌لره سبب اولان یانلیش دوشونجه و پلان‌لار ایله دوام ائده‌رک، او فلاکت‌لردن قورتولماق اولماز. بونا گؤره ده، بوگون میللی حرکتیمیزین هدفی، ایران حکومتینی ده‌ییشدیریب باشقا بیر حکومت قورماق یئرینه، یالنیز و یالنیز اؤز میللی دولتیمیزی یئنیدن قورماق اولموشدور.
Nə Etməliyik
بو سبب‌لره گؤره، داها ائتکیلی، جسارت‌لی و یئره باسان آددیم‌لارلا، استراتژی و یول خریته‌میزی بلیرله‌ییب، ان قیسسا زاماندا گونئی آذربایجانی قورتاریب، میللی دولتیمیزی قورمالییق. یول خریته‌میزی بلیرله‌مک اوچون، اورتاق هدفیمیز و ایلکه‌لریمیز شفاف شکیلده معین اولمالیدیر. هدفیمیز و ایلکه‌لریمیز معین اولماسا، هییچ بیر فرصتی دوزگون ده‌یرلندیره بیلمه‌یه‌جه‌ییک و هارا گئده‌جه‌یینی بیلمه‌ین بیر گمیچی کیمی، هیچ بیر کوله‌یین بیزه فایداسی اولمایاجاق. هدفسیز و ویزیونسوز بیر مجادله، بوشونا زامان گئچیرمکدیر، ائیلم‌سیز و حرکتسیز دوشونجه ایسه یالنیز بیر آرزو و خیال‌دیر. اورتاق هدفیمیز بللی اولورسا اونا چاتماق اوچون اورتاق استراتژی‌لر و تاکتیک‌لری پلانلایب، ویزیونلو بیر شکیلده حرکته گئچیب، دنیانی ده‌ییش‌دیره بیلریک.
استراتژی‌لر هدفه چاتماغین یولو و روتاسی‌دیر، ایلکه‌لر ایسه دوغرو یولدا اولدوغوموزو گؤسترن ایشیق‌لاردیر. هدفیمیزه چاتماق اوچون، روتامیز(استراتژی‌لریمیز) وارسا، دوغرو یؤن‌ده ایلرله‌مک و یولدان ساپماماق اوچون، یولوموزو ایشیق‌لاندیران دنیز فنری، قطب نما، رادار و اولدوزلارا، یعنی ایلکه‌لره احتیاجیمیز واردیر.
Bir yanıt yazın