گونئی آذربایجان میللی حرکتی‌نین اساس ایسته‌یی، غصب اولونموش و استثمار اولونموش دولت‌چیلی‌یینی گئری آلماقدیر. بیزیم هیچ کیمین وطنین‌ده یا دا دولتین‌ده گؤزوموز یوخدور. بیز، مین ایل‌لردیر بابالاریمیزین اداره ائتدی‌یی، آما سون یوز ایل‌ده غصب اولونموش اؤز دولتیمیزی یئنی‌دن قورماق ایسته‌ییریک. سیاسی باغیمسیزلیق ایسته‌ییمیزین مشروعیتینین آنا قایناغی دا بودور. بونون‌لا برابر، گونئی آذربایجان میللتی دموکراتیک حق‌لره دایاناراق، اؤز سرنوشتینی تعیین ائتمه حقینه ده صاحبدیر. عینی زاماندا یوز ایلدیر گونئی آذربایجان تورکلری، ایران دولتی چرچیوه‌سینده، دموکراتیک و میللی حقلرینین تامین اولماسی اوچون، دواملی مجادله ائدیبدیر. آما بوتون ایران حاکمیتلری، بو باریشچیل و دموکراتیک ایستکلره قارشی، آمانسیز و نسبت‌سیز شدت، جنایت و قتل‌عام‌لار ائدیبلر. آرتیق ایران دولتی چرچیوه‌سینده، گونئی آذربایجانین دموکراتیک حقلرینین تامین اولونماسینین امکانسیز اولدوغو، اثبات اولوب‌دور. بونا گؤره ده، گونئی آذربایجانینین، سیاسی مستقل‌لیک‌دن باشقا بیر یولو قالماییب‌دیر. ایران دولتینین آذربایجانا قارشی قتل‌عام‌لار و انسانلیق‌دان کنار جنایت‌لری و ملتیمیزین یوز ایللیک مجادله‌سی، حرکتیمیزین دیگر مشروعیت قایناغیدیر.
بیر میللی حرکت، میللی مجادله ائدیب، میللی دولتینی قورار، سونرا مستقل‌لیک اعلانی و باشقا اؤلکه‌لرین رسمیته تانینماسی ایله سون هدفینه چاتار. بو مرحله‌لرین هر بیرینین فرقلی استراتژی‌لری و حقوق‌لاری واردیر.
- میللی مبارزه و قورتولوش ساواشی هر میللتین انسانی حقی‌دیر و دونیانین بوتون آزاده انسانلاری، قورتولوش مجادله‌سی ائدن مباریزلره سایقی گؤسترر. ترور و انسانلیق جنایت‌لره قاریشمادان، هر جور سیلاحسیز و یا سیلاحلی قورتولوش ساواشی، بوتون اولوسلار آراسی قورولوشلاردا و حقوق دا، قبول ائدیل‌میش بیر حقدیر.
- اؤزونو تمثیل ائدن میللی حکومتینی قوروب، اداره‌سینی اؤز الینه گئچیریب، اؤز تورپاقلاریندا ائگئمن‌لی‌یینی تامین ائتمک، بیر میللتین ان دموکراتیک حقی‌دیر و اؤز سرنوشتینی تعیین ائتمه حقینین ان اساس تجلی‌سی‌دیر. اؤز تورپاقلاریندا اتوریته‌سینی تامین ائتمیش و وطن‌داشلارینین انسانی حقوقلارینا حرمت‌لی بیر میللی حکومت، مستقل‌لیک اعلان ائتسه ده-ائتمه‌سه ده، باشقا اؤلکه‌لر طرفیندن رسمیته تانینسا دا-تانینماسا دا، اولوسلار آراسی حقوق‌دا، بیر دولت حقوقونا مالیک‌دیر.
- هر دولت، میللی مجلیس و میللتین اونایی ایله مستقل‌لیک اعلان ائتمه حقینه صاحیب‌دیر
- مستقل‌لیک اعلان ائتمیش بیر دولت، فرقلی شرط‌لرده، باشقا اؤلکه‌لر و تشکیلاتلار طرفیندن رسمیته تانینا بیلر. اولوسلار آراسی حقوق‌دا، بو موضوع‌دا هر نه قدر بلیرسیزلیق و مباحثه اولسا دا، بیر اؤلکه‌نین باشقا اؤلکه‌یی رسمیته تانیما موضوع‌سو، تماما رئال پولیتیک ایله ایلگیلی‌دیر. گونئی آذربایجانین مدرن و گلیشمیش مدنیتی، انسانی گوجو، زنگین جغرافیاسی ، ژئوپولیتبک موقعیتی و قارداش اؤلکه‌لرین دستک‌لری، بو مرحله‌دن ده گئچه‌بیله‌جک پتانسیل‌ین ضمانتی‌دیر.
بیز گونئی آذربایجان میللی حرکتی اولاراق بیرینجی مرحله، یعنی میللی مجادله و قورتولوش ساواشی مرحله‌سینده‌ییک. بوگون، تک هدفیمیز بیر سونراکی مرحله‌یه یئتیشمک، یعنی میللی دولتیمیزی قورماقدیر. بوتون مجادله و انرژی‌میزی، اونا صرف ائتمه‌لی‌ییک. بوتون استراتژی و تاکتیک‌لریمیز، بیزی اونا دوغرو بیر آددیم آپارمالیدیر.
Bir yanıt yazın