دولت قورماق انسانلیغین ان بویوک باشاریسی، تورک تؤره و عنعنه‌لرینین تملی‌دیر. دولت، بیر یورد و وطنده یاشایان انسان‌لارین ان اوست اداره ائتمه وسیله‌سی‌دیر. بیر توپلومو بیرلشدیریب، میللت ائدن سؤزلشمه و مکانیزمین آدیدیر. دولت، بللی بیر وطنده، میلتین سیاسی بیرلی‌یین‌دن دوغان حقوقی بیر وارلیق‌دیر، یعنی میللتین اراده‌سینین تجللی‌سیدیر. توپلومو تمثیل ائدن بیر دولت وارسا انسانلار بیز اولار، یعنی میللت اولار، یوخسا بیربیریندن آیری قالیب، باشقا میللت‌لرین آیاقلاری آلتیندا یوخ اولار. میللی دولت اولماسا، میللی بیرلیک ده اولاماز، میللی بیرلی‌یی اولمایان توپلومون دا فاعلیت قابلیتی اولاماز.
گونئی آذربایجان تورکلرینین، سوسیال و اقتصادی ساحه‌لرده آزادلیغی و گلیشمه‌سی اوچون، اؤنجه گونئی آذربایجانین اؤزو آزاد اولوب، میللی دولتینی قورمالی‌دیر. محکوم میللتین اختیاری هیچ وقت اؤزونده اولماز. اونون طالعینی حاکیم میللت‌لرین نماینده‌لری تعیین ائدر، اونلار دا، اؤز میللت‌لرینین چیخارلارینی گوده‌ر. یعنی میللی دولتی اولمایان بیر خالقین سوسیال آزادلیغی، دموکراسیه چاتماسی و اقتصادی گلیشمه‌سی امکان‌سیزدیر.
بیز دولت‌سیز قالدیغیمیز سون یوز ایلده، یاشادیغیمیز بؤیوک فلاکت‌لر، دردلر، حقارت‌لر و عدالت‌سیزلیک‌لرین، دولت‌سیزلیک‌دن باشیمیزا گلدی‌یینی آنلاییب، درسیمیزی آلمیشیق. و بیلیرک کی بیر میللتین آزادلیغینی قورویا بیله‌جک تک گوج، اونون میللی دولتی‌دیر. اونا گوره‌دیر کی، بو فلاکت‌لردن قورتولوب، مرفه، اؤزگور و شرفلی یاشاماق اوچون، بیزی تمثیل ائدن و بیزی بیز ائدن بیر میللی دولت ایسته‌ییریک. شبهه‌سیز، وطنیمیز آذربایجان اوچون، میللتیمیزین رفاهی و خوشبختلیغی اوچون، حیاتیمیز، ناموسوموز، شرفیمیز، گه‌له‌جه‌ییمیز و ایناندیغیمیز مقدسلریمیز اوچون یعنی هر شئی‌یمیز اوچون، بوتون دویغولاریمیزلا، آییق‌لیغیمیزلا و گوجوموزله، گونئی آذربایجان میللی دولتینی قوروب قوروماق اوچون مجادله ائدیریک و ائده‌جه‌ییک. بونو دا بیر سئچیم کیمی ده‌ییل، انسانلیق وظیفه‌میز بیلیریک. بو وظیفه‌میزی یئرینه یئتیرمک اوچون، ایلکه‌لر و استراتژی‌لریمیزی دقت‌له بلیرله‌ییب، تک هدفیمیز یعنی میللی دولتیمیزی قورماق اوچون مبارزه ائت‌مه‌لی‌ییک. بیزیم اوچون ان بؤیوک تهلکه، هدفیمیزین چوخ یوکسک یعنی تام باغیمسیز بیر میللی دولت اولماسی و اونون اوچون چیرپینماق ده‌ییل، هدفیمیزین چوخ آشاغی و کیچیک چخارلار اولماسی‌دیر. ایچیمیزده بؤیوک هدف یوخسا، دنیانین بیزه وئره‌بیله‌جه‌یی هیچ بیر شئی یوخدور. بؤیوک هدفیمیز اولسا و اونا ایسرار ائتدیب اونون اوچون مبارزه ائتسک، امکانسیزلار ممکن، ممکن‌لر محتمل و محتمل‌لر قطعی اولاجاق.
Bir yanıt yazın