میللی دولت بیر میللتین بیرلی‌یی‌نین و اراده‌سینین تجللی‌سی‌دیر. میللی دولت بیر میللتین یاشاماغی و وار اولماسی اوچون ان بؤیوک ثروتی‌دیر. باشقا مللت‌لرین استثماری آلتیندا اولان بیر میللت، یالنیز استثماردان قورتولوب، اوز میللی دولتینی قوراراق، ان یوکسک خیری، ان یوکسک کمالی و ان یوکسک سعادتی الده ائده بیلر. میللی دولت ائله بیر ایشیق‌دیر کی انون قارشیسندا زنجیرلر اریه‌ر، تاج و تخت‌لر یانار و میللتین اسارتی اوچون قورولموش بوتون قورولوش‌لار ییخیلار. میللی دولت توپلومو میللت ائدر، میللت ده اونو دولت ائدر، بیرینین وارلیغی اوچون اوبیرینین اولماغی شرط‌دیر.
انسان توپلوملاری دولت اوتوریته‌سی اولمادان یاشایا بیل‌مز. توپلومدا اؤزگورلوغون، برابرلیغین و عدالتین ساغلانماسی و قورونماسی، آنجاق و آنجاق میللی دولتین قورولماسی و میللی ائگئمن‌لی‌یین تامین ائدیلمه‌سی ایله ممکن‌دور. بیر دولت، قانون‌لارینی و طرح‌لرینی اجرا ائتمک اوچون، داخلی و خارجی اوتوریته‌یه و ائگئمن‌لیغه صاحب اولار. داخلی ائگئمن‌لیغه صاحب اولان بیر دولتین، یالنیز اؤز تورپاقلاری و وطن‌داشلاری ایچینده اوتوریته‌سی اولار. یعنی اؤز توپراقلاری ایچینده، قرارلار آلیب، باشقا بیر دولت یا دا قورولوشون اجازه‌سینه احتیاج اولمادان اجرا ائده بیلر. خارجی یا دا مللی ائگئمن‌لیک ایسه، بیر دولتین اولوسلار آراسینداکی یئری و مستقل بیر وارلیق اولاراق فعالیت ائتمه‌سینی ساغلار. مستقل و ائگئمن دولت، یالنیز خارجی ائگئمن‌لی‌یینی قازانمیش بیر دولت‌دیر.
ان بویوک شرف تام باغیمسیزلیق و استقلال اولسا دا، میللی فعاللاریمیزین بیر قیسمی، گؤنئی آذربایجان میللی دولتی اوچون ،بعضی سیستملرده اولدوغو کیمی، داخلی ائگئمن‌لی‌یین یئترلی و ال‌چاتان اولدوغونو دوشونورلر. آنجاق میللی فعاللارین چوغونلوغو، گونئی آذربایجان و دنیاداکی وضعیت و باشقا تجربه‌لره دایاناراق، تک قورتولوش یولوموزو، تام مستقل و ائگئمن بیر گونئی آذربایجان دولتینده گؤرورلر. بو دوشونجه‌‌لرین ایکیسی ده، آذربایجان مرکزلی اولدوقجا، میللی حرکتیمیزین ایچینده و تک آماجیمیزین دوغرولتوسوندادیر. آما گونئی آذربایجان یئرینه ایران مرکزلی دوشونولورسه، یعنی ایرانی فئدرال، کونفئدرال ویا داها دموکراتیک بیر دولته چئویرمک کیمی بیر آماج وارسا، اونا گونئی آذربایجان میللی حرکتی دئییل‌مز. گونئی آذربایجان میللی حرکتینین ایران و ایراندا یاشایان باشقا میللتلرین سرنوشتینی تعیین ائتمک کیمی بیر هدفی یوخدور. ذاتا بونا نه حقی واردیر نه ده گؤجو یئتر. میللی حرکتیمیزین آماجی گونئی آذربایجان دولتینی قورماقدیر، ایستر ایرانین قالانی پارچالانسین، فدرال اولسون، اولدوغو کیمی قالسین، داها پیس اولسون یا دا داها یاخشی اولسون. بونلارین هیچ بیری، آماجیمیزی ائتکیله‌مز و ده‌ییشدیرمز. البته بو، گونئی آذربایجانین بؤلگه خالقلارین‌دان آیریلماق ایسته‌دیغی آنلامینا گلمز. بیز بؤلگمیزده‌کی بوتون خالقلار ایله باریش ایچینده، آزاد و برابر یاشاییب، دایانیشماق ایسته‌ییریک. بو دا، داها ساغلام بیر پلاتفرم‌دا، یعنی بیزی تمثیل ائدن گونئی آذربایجان دولتی سایه‌سینده اولا بیلر. بوگون، قاشقایلار، خوراسان تورک‌لری و ترکمنلر کیمی دوغما قارداشلاریمیزلا برابر، قونشولاریمیز اولان کوردلر، لورلار، عربلر، گیلک‌لر و حتی فارسلارلا بیرگه، ایران آدلانان اؤلکه‌نین فرقلی زیندانلاریندا محبوسوق. بو زیندان‌لاردان قورتولماق هرکسین حقی‌دیر. آنجاق بیز زینداندا اولدوقجا، نه باشقا زیندانلارداکی قارداشلاریمیزی و قونشولاریمیزی قورتارا بیله‌ریک، نه ده اونلارا بیر فایدامیز اولا بیلر. اؤنجه اؤزوموزو قورتارمالییق کی قارداش و قونشو خالقلارا دا، یاردیم الیمیز و گوجوموز اولسون.
Bir yanıt yazın